疫情下寧舍想飲茶?行山友最愛大帽山「端記」

 

最近因為限聚令,無得約埋成班老友一齊去飲茶,生活樂趣真係少咗好多。提起飲茶,茶客、行山友一定聽過
大帽山端記茶樓
。小編認為香港唔缺美食,但既有風味又特色嘅餐廳就非常少見,喺大帽山腰川龍轉角位嘅「端記」,小編印象特別深刻。茶樓格局係香港傳統嘅三層村屋,每層面積都唔大,餐廳係開放式,冇咩特別裝修,由搵位、準備茶水、拎餐具同食物全部都係自助形式,完全自由嘅感覺。而茶樓係用山水沖茶,賣嘅都係傳統懷舊點心,好似蝦餃、大包、牛肉球、鵪鶉蛋燒賣、鮮蝦銀針粉同盅頭飯等,每當聽到點心出爐,大家就一齊蜂擁去「攞」點心(似搶點心多啲),睇著大家互動,空氣中瀰漫著濃濃嘅人情味。最特別係茶樓置身於山林之間,面對大自然,邊嘆住邊食點心,聽著雀仔嘅歌聲,呼吸著新鮮空氣,感覺特別自在。
而川龍另一個遠近馳名嘅特色係西洋菜,因為大帽山嘅地勢同氣候,比元朗平原氣溫低而霧多潮濕,同時用山水嚟灌溉,唔使用化肥去催谷縮短生長期,比量產嘅西洋菜喺陽光下享受多大半個月……所以特別鮮甜! 每次去端記飲茶一定會叫一個香氣十足嘅盅頭飯同鮮甜嘅西洋菜,之後再同屋企人行5分鐘去附近嘅西洋菜田,買啲菜返去慢慢品嚐。西洋菜同懷舊點心雖然唔係咩隱世美食,但佢哋係一種隱藏喺香港罕有嘅鄉村風味。
端記暫時唔供應堂食,不過早前曾推出「郊野公園點心便當」,包括雞屎藤茶果、鵪鶉蛋燒賣、雞包仔等,希望喺疫情之下大家依然可以享受到新鮮嘅點心。錯過咗都唔使失望,遲啲等疫情緩和咗,大家可以約埋班朋友去大帽山行山,再歎番杯靚茶。除咗「端記」之外,各位讀者又有冇其他香港傳統酒樓可以推薦比大家呢?

留言