人大咗，食小食唔單止係為咗醫肚，或者係美味，而係想懷念當初嘅美好歲月，呢個就係小食嘅意義所在。諗返起童年嗰段青葱歲月，雞蛋仔、糖葱餅、叮叮糖、碗仔翅呢啲懷舊小食，係唔少人嘅共同回憶。冇複雜嘅工序，冇高檔嘅食材，但係可以塑造出最難忘嘅味道。或者係想話俾我哋聽，快樂回憶嘅泉源其實可以好簡單。時至今日，呢啲小食有啲依然長賣長有，有啲買少見少，有啲甚至消聲匿跡，無論係鹹係甜定係辣，相信呢啲「兒時味道」，最後都會令我哋甜在心頭。
而眾多懷舊小食入面，首選一定係碗仔翅，佢係香港街頭小食嘅經典，粉絲當魚翅，係好多升斗市民回憶嘅味道，佢雖不係真正魚翅，但起源係嚟自真魚翅。四五十年代喺廟街榕樹頭一帶，街邊檔用俗稱「倒餿水」，即係酒樓食剩嘅翅頭翅尾，加入冬菇、木耳、豬肉絲、高湯加入味精、馬蹄粉（或豆粉）等煮成。
而碗仔翅要做得好食，最重要有三個元素，第一係湯底要夠香，唔可以淡而無味，第二係配料同湯嘅比例要適中，大約五比五，尤其係粉絲，本身會吸水，如果落太多，碗仔翅就會變得好似漿糊咁，所以小編會改用日本素翅，口感較佳但係又唔會似漿糊。第三係芡要打得好，芡盡量分幾次加入，等芡水同配料充分拌勻，咁樣芡就唔會凝成一塊塊。
但隨著香港生活質量提高，呢種昔日難登大雅之堂嘅街頭食品，喺90年代後香港一啲酒樓亦有出售，除咗肉絲份量增加，亦會加入香菇絲、蛋花、甚至係金華火腿、豬皮、魚肚等食材。疫情期間，好多人喺屋企煮飯做甜品，不妨趁住假日試下整呢款懷舊碗仔翅，等我哋一齊嚟復刻屬於你嘅兒時味道！
碗仔翅被稱為平民魚翅，自家製的話，真材實料之餘又無添加，同時最引人嘅地方係可以勾起那年那月那日嘅情景，令人再三回味。
雞脾 2隻 雞湯 1公升 冬菇 6隻(切絲)
素翅三塊 蛋 2隻 水 1公升
芡水
馬蹄粉 三湯匙 水份 兩湯匙
調味料
鹽 適量 老抽 1湯匙 麻油 1湯匙
做法：
1. 先將素翅浸軟。
3. 將雞湯及水煮滾後，將雞絲及冬菇加入湯中煮10分鐘。
4. 將素翅加入湯中煮滾。
5. 將調味料及芡水加入，拌勻煮滾。
6. 最後將雞蛋加入，拌勻成蛋花即可。
可按個人口味改用雞胸肉。
想方便可改用即用雞湯。
可用雞殼淆成雞湯更為美味。
以上為四人份量。
留言
發佈留言