堅守3大原則 疫情買餸無難度

最近疫情嚴峻,唔少人都減少咗出門買餸嘅次數。同時多咗人網購,而且一啲可以長時間存放嘅凍肉、罐頭等,都成為搶手貨。但係一次過買咁多食材,一定好快逼爆個雪櫃。其實唔同食材有唔同嘅儲存同處理技巧,只要用啱方法,煮嘅時候就可以即刻放落鍋到,既方便又慳時間。今次就同大家分享下點樣一次過買晒一星期嘅食材啦!
原則-:宜選瓜類蔬菜
今次小編大部份食材都係喺超市購買,而且以長時間存放為原則。瓜菜類會揀蕃茄、薯仔、袋裝甘筍、三色椒、四季豆、南瓜、節瓜、翠玉瓜、四季豆等,因為呢啲蔬菜類可以存放較長嘅時間,同時亦會買1-2款綠葉蔬菜,一款當日食用;另外嗰啲就用廚房紙包裝好,再入袋放入雪櫃冷藏,保持乾爽一般都可以喺3-4日內食用。

原則二:善用湯料包 省備料時間
好多超市都有材料齊全嘅湯料包,只要加入肉類就可以煲出夠3-4人享用嘅「靚湯」,亦係必買之選。

原則三:將肉類預先分工、分成適當份量
另外,一定會買2條鮮魚:一條當晚食,另一條唔洗清洗,加少少鹽醃製成鹹鮮魚,用保鮮紙包好後放入冰箱冷藏,一般可以喺一星期內食用,食之前一日將魚由冰箱放入雪櫃下層回溫就可以。豬肉方面,會選購包裝好嘅豬腱用嚟煲湯,同時會買啲免治豬肉,返屋企後先醃製好,再放入密實袋,用筷子喺中央壓出十字分格線,成為四等份冷藏,每次用嘅時候淨係需要其中一份拎出嚟解凍,咁啲肉就唔會因為喺空氣中暴露太耐,而滋生細菌。牛肉方面,建議網購原條冰鮮牛柳,冰鮮即係非急凍,佢嘅肉質燴保住最佳狀態。將牛柳切成每塊約2寸厚,再用保鮮袋獨立包好,保鮮之餘又方便放喺冰格。總括是今次買嘅食材可以煮到一星期嘅菜式,大家參考一下,互相交流!!



留言